Ora ku un doño di trabao I e trahadó ta skohe pa terminá e relashon laboral pa via di mediashon, nos ta papia di ‘exit-mediation’.

Akinan ku 'exit'  ke men di e ida di e trahadó di e organisashon. Hopi biaha ta pasa ku e doño di trabao I e empleado ta bai fe otro ku pleitu, pero ‘exit-mediation’ yùist ta dirigí pa bai den bon relashon fe otro. Na e forma aki ta prevení un proseso largu I tur dos partido sa liher den ki forma lo terminá e relashon laboral.

Tambe ora un partido – hopi bes e doño di trabao- ta mira e trayekto di mediashon pa jega na akuerdonan pa terminá e relashon laboral, esei no ta stroba e trayekto, paso normalmente ku mediashon partidonan por sigi nan relashon. Den a kaso aki ta asina ku partidonan tur dos, e doño di trabao i e empleado, tin un interes pa terminá e relashon i den mediashon ta tene kuenta ku e interes ei di ambos partido.

Ku un trayekto di ‘exit-mediation’ partidonan ta palabrá huntu bou di guía di e mediador bou di ki kondishonnan e relashon di trabao lo terminá. E mediador tambe ta informá e partidonan over di e konsekuesianan hurídiko di nan eskoho. Pesei e ta konsehabel den e kaso aki si ta skohe un mediador, pa skohe un mediador ku tin konosementu over di derecho di labor.

‘Exit-mediation’ hopi bes no ta bai solamente over di e montante di sen ku e trahadó tin ku hanja di e doño di trabao ora di terminá e relashon laboral ku e trahadó. Tambe por elaborá por ehempel riba rekapasitashon di e trahadó si esei no a sosodé ainda durante di e relashon laboral. Tambe e doño di  trabao por usa su kontaktunan pa juda e trahadó ku lo sali di e organisashon.  Hopi bes e ‘Kantontonrechtersformule’ ta forma e punto di salida di e negosiashon over di e kompensashon di e retiru.

E mediador ta independiente I imparsial, e no ta husga pero ta guia e partidonan den e trayekto di terminashon di e relashon laboral. Mediashon pues por wòrdu interpretá tambe komo negosiashon na un manera positivo pa yega na un solushón ku ta akseptabel pa ambos partisipante. 

 

Bentaha di ‘Exit-Mediation’

E bentahanan di ‘exit- mediation’ kompará ku e otro formanan tradishonal di solushoná konflikto, manera entamá un kaso na korte ta:

Un kombersashon neutral ku un tersera persona lo kana muchu mas mihor. E mediador ta entrená pa guía e partisipantenan den e trayekto di mediashon I ta sòru pa sufisiente tempu  pa tuma na konsiderashon  I deliberashon tur punto pa nada wòrdu disidí purá I ambos partido ta hanja un solushon ku nan ta keda kontentu kune.

Por deliberá sin kompromiso ku otro over di posibel kombenio. Te ora ku ambos partido a firma e kontrakt nan ta mará na e kombenionan trahá.

Mediashon por kuminsa liher I terminá liher tambe.

Un otro bentaha di ‘exit mediation’ ta ku pa e partido ku ta sali di e organisashon e ida ta hopi menos drástiko ku si su ida lo kana via di un proseso hurídiko na korte unda ku e ida ta wordu imponé riba e partido. Den un proseso asina na korte e banda emoshonal di e kaso no ta bini dilanti, manera den un trayekto di mediashon. Tambe un bentaha grandi ku ‘exit-mediation’ tin ta ku e empleado ku ta  bai di e organisashon ta aksepta esaki mas fasil pasobra den e kaso aki e empleado tin e sintimentu ku e mes a partisipá aktivamente pa jega na e desishon final aki. Tambe pa e koleganan ku si ta keda traha den e organisashon ei, un trayekto di mediashon ta hopi mas postivo pa nan ku un proseso estrikto na korte unda ku e empleado (nan kolega) ta wòrdu obligá pa bai di e organisashon, ku pa nan, por duna e kompanía un imagen negativo. Klaro esaki no ta den tur kaso i ta depende di kada situashon pa ku e rason dikon e empleado ta hanja retiru.

Si partidonan tin un interes pa no bai hues pero pa mes bini na un akuerdo huntu, e chens ku partidonan ta logra solushoná e konflikto ku ‘exit mediation’ i bini ku akuerdonan akseptá dor di ambos partido, ta hopi grandi.  

En todo kaso si tòg e trayekto di mediashon no tin un kabamentu eksitoso, semper ta posibel pa partidonan bai korte ainda. Pero di un trayekto di mediashon por spera, meskos ku na Hulanda,  ku tres kuartu parti di e kasonan ku  ta attendé a trabes di mediashon ta wòrdu solushoná den su totalidat of parsialmente.

Pa konseho hurídiko over di derecho di labor of guía den un trayekto di retiru via di mediashon, esta  ‘exit-mediation’, por tuma kontakto ku Sra. Giolina Daal, GKD Advocaten & Mediators,  www.gkd-advocatenmediators.com

Pa mas informashon jama: tel: 527 7654 òf manda e-mail na: daal@gkd-advocatenmediators.com